Boin temps por un interremeint | |||
Is sont vnus, is sont mie tertous per ichi ! Ale a bin fini per ête au rados el man-man, vu s' n'âge ! Il n'y o pu granmint ed mon.ne achteure à z'interremeints ! Chès viux, tertous partis itou. J'n'sais mie à d'où pache que j'n'y voès rin : ni ch'boin Diu, ni ch'Diawl, ni ch' Paradis ! Chés éfants in breimeints aveuc leus lédgimpettes tien-nent't leus galoubis à leus piys, in silinche. Coère bin héreux qui leu n'vienche point l'idèye d'écmainder por mi un.ne "boète à définctés" per ch' l'arnitoèle, conme ch'est l'mode achteure, aveuc plaque pis couron.ne. J' r' san.ne à un.ne metchène aveuc min rouche robillon à frous-frous. Mes frongnes a s'sont involèes ! Ej sus à sin goût ach grand feutcheu ! Ch'est chés courts jors. Ech vint, d'un.ne incroèyabe doucheur dreche chés gveux ed chés vivants invers ch'firmamint. Is cantent't un.ne canchon d'Aznavour in r'natchant un mollet dins leu blanc moutchoèr. El tchiote Jean.ne, ale san.ne fin bénèse avec sin neu mintieu pis ses noèrtes coeuchures milantes. Ale est bin fière- tchul ed laincher padsus min lusé un.ne poégnie ed tére pis el preume margrite dech courtil. Chés miaules ales dinchent't padsus chés tiètes, pis mi, ej m'invole aveuc por un.ne virvourande ed luron.nache. | |||
|